من صغرى أيام ما كنا بنجيب أهرام الجمعة (زماااان يعنى) كنت متعود افتح الجرنان و أقلب فى الصور و الحتة بتاع "صدق أو لا تصدق" اللى مكتوبة دايما بخط الايد دى و جمبها "حظك اليوم" و كنت مش فاهم اسامى الحيوانات اللى بقراها دى علاقتها ايه بالكلام اللى مكتوب جمبها !!!
سألت والدى عن الموضوع دا و بدأ يفهمنى و قالى ان دا طبعا كله كذب و المفروض ما نؤمنش بالكلام دا
و بمبدأ الفضول و ان الممنوع مرغوب كنت بقراها بس ما بصدقهاش و لا بقتنع بيها ... تدريجيا ما عدتش بقراها تانى
ـــــــــــــــــــــــــــــــــــ
من فترة كده لقيت اعلانات
اتصل و اعرف : حظك اليوم و برجك العادى و برجك الصينى و برجك العربى و برجك الرقمى و حجرك الكريم و رقمك المفضل
تكاثروا بقى
بصراحة عقلى مش راضى يتقبل حاجة زى دى أبدا :
ان من تاريخ ميلادى ممكن واحد (بطريقة ما) يعرف صفاتى و شخصيتى و كمان حظى ... كل يوم !!!! دا ايه العلم الجامد دا ؟؟!!
أنا شايف واحد بعيد أهو بيقولى يا عم دا فلك و نجوم و أبراج و كتب و علماء و حاجات انت ما تفهمش فيها
أقوله معلش خدنى على قد عقلى ، تعالى نعمل تجربة علمية عملية ... "بالرغم من كل مساوئ مادة الصحة العامة إلا أنها عملتنى مبادئ و اسس التجارب و الاحصاء"
طيب دلوقتى شخص ما اتولد فى تاريخ معين و المفروض ان من تاريخ ميلاده أعرف شخصيته
طب يا ترى ايه العامل المشترك بين كل الناس اللى بيتولدوا فى نفس التواريخ فى كل العالم عشان يطلعوا بشخصيات متقاربة ؟؟؟
ما هو أكيد فى عامل مشترك أثر عليهم !!!!
نقدر نقول ترتيب النجوم فى السما زى ما مبادئ "العلم" دا بتقول
طيب ترتيب النجوم فى السما هيعمل ايه ؟؟ هيبعت أشعة مثلا غير مرئية تؤثر على مخ الأطفال اللى بيتولدوا ساعتها !!!!
مممممم ..... طب ما الستات بيولدوا فى أوضة عمليات و بتبقى مقفولة كويس
يبقى فين التأثير ؟؟؟؟؟
طب تعالى نخلى اتنين بيولدوا و نخلى واحدة تولد و النجوم فوقيها ... Case
و التانية تولد جوة أوضة عمليات مثلا ...... Control
و نشوفهم ، المفروض واحد يكون اتأثر بالنجوم و التانى لأ و لكن هما أصلا ما بيعترفوش بحاجة زى دى و عندهم كله زى بعضه
التأثير اللى أعرفه مثلا لو الأم خدت دوا بيعدى للجنين أو لو الدكتور غلط فى خطوة من خطوات الولادة
التأثير اللى أعرفه هو تأثير البيئة و تأثير الأسرة و تأثير المجتمع و تأثير المدرسة و تأثير المستشفى و تأثير البلد و تأثير التليفزيون و تأثير الانترنت .... هى دى الحاجات اللى بتبنى شخصية الإنسان
حقيقة : أغلب أفراد عيلتنا مولودين فى شهر 3 ... و كل واحد اتربى فى حتة شكل فى اتربوا فى قرية فى اتربوا فى مدينة فى اتربوا برة مصر و كل واحد له شخصية مغايرة تمااااااااااما و الصفات المشتركة ما بينهم لا تتجاوز الصفات المشتركة بين بنى البشر و بعضهم
تقوم كمان تقولى حظك اليوم !!!!! (تــــيــــت)
الخلاصة : لا يجوز بناء "علم" بناء على مشاهدات و فرضيات و "خرافات" أحيانا انما "العلم" فعلا يبنى على التجربة العملية و المقارنة و التحليل
و ادعاء معرفة شخصية انسان ما من تايخ ميلاده عندى زى اللى يعمل دراسة عن : تأثير لون العربية على قوة المحرك
ايه العلاقة بينهم أصلا اللى هتخلى يبقى فيه تأثير ؟؟؟
و زى اللى بيقول ان اللى بيحدد نوع الطقل التانى لا الكروموسومات و لا الانقسام الميوزى و لا كروموسوم Y و لا حتى كرموسوم X
انما اللى بيحدد نوع الطفل التانى هو شعر أخوه الكبير لو كان عنده بريمة واحدة فى شعره ييجى بعده ولد و لو عنده بريمتين ييجى بعده بنت
يعنى من الآخر كل علماء الوراثة يروحوا يولعوا فى نفسهم أكرملهم بعد الكلام دا !
و اكتشاف الخريطة الجينية و ... و .... و ... و ألاقى ناس لغاية حالا مؤمنين بموضوع البريمة !!!!
فكرونى بموضوع ابراهيم حسن لما قال معمولنا عمل !!!!
أرجوكم احنا مش ناقصين مزيد من الجهل و الخرافات تسيطر على فكرنا و على حياتنا اليومية ... أرجوك حكم عقلك قبل ما تنجرف ورا حاجة زى دى
ملحوظة : و انا ببحث عن صورة أستخدمها للتدوينة كتبت "أبراج" طلعتلى صور زى اللى فوق و طلعتلى صور تانية لأبراج على النقيض تماما من الأبراج اللى اتكلمت عنها
فعلا هى دى الأبراج اللى عقلى يقتنع بيها
ليست هناك تعليقات:
إرسال تعليق