المعهد !

تُقرأ فى 3 دقائق

حبيت أختم السنة اللى انا بحبها أوى أوى أوى دى بالتدوينة دى

لمدة 3 شهور كنت طالب فى معهد .... أيوة معهد

لكن كما يقول المثل : الفرق بين مصر و ألمانيا زى الفرق بين المعهد الصناعى العالى و معهد جوته !

3 شهور قضيتهم فى معهد جوته بدرس هناك و بالرغم من النظام و النظافة و التعليم الصح أوى اللى هناك برضه أحسن حاجة طلعت بيها هما الناس .. اكتسبت هناك أصدقاء أحببتهم فى الله و ان شاء الله يدوم الود بينا

بغض النظر عن القصر اللى الألمان واخدينه فى ميدان المساحة فى الدقى و بغض النظر عن ان القصر دا بالرغم من انه قديم فحت إلا إنه مكيف و مضاء و مدهون و متلمع و بيبرق و باركيه و سلالم جرانيت ... كل ما بشوفه بفتكر القصور اللى فى منطقة ميدان الساعة و شارع البورصة و البواكى فى طنطا و بتقفل لما ألاقى الفيلا من دول متربة مهكعة مشرخة و كمان ألاقى حبل غسيل على البلكونة !

معهد جوته بيعتمد فى تعليمه على الشغل الجماعى و الألعاب التعليمية و كل مهارات اللغة من قراءة و سماع و تحدث و كتابة عملناها .. بشرط المجموعة ما تزيدش عن 18 و كل 4 على ترابيزة كده معينة حلوة

أما و قد تلطخت يداى !

تُقرأ فى 5 دقائق

Photo By : Moshey

هل لأنك مريض لازم 40 طالب طب يفحصوك ؟ سواء صح أو غلط و قدام بعض ؟؟

هل لأنك مريض تكشف (تكشفى) ملابسك أمام 40 طالب و طالبة طب ؟

هل لأنك مريض يدخل عليك أى طالب طب فى أى وقت و يفحصك و يكتب "شيت" عليك ؟

الإجابة لا .. لكن لأنك مريض فقير ممكن كل دا يحصل ! فى "الخرابة" أقصد المستشفى الجامعى

اللى بيحصل ان عندى فى خلال الـ 3 شهور بتوع الباطنة العامة (اللى هو أسوأ راوند فى الكون أصلا) المفروض "أشيت"ّ 3 حالات و آخر حالة كانت عندى النهارده .

امبارح روحت للنايب (اللى كان صعبان عليا فعلا) و من الواضح انه طالع من نبطشية اللى هى 48 ساعة دى (أكتر من اللى بيقرها قانون العمل الدولى بـ 40 ساعة) ! و كمان مكلف انه يدى للطلاب حالات و لو قصر فى حاجة زى كدا هو أكيد عارف ايه اللى ممكن يحصله 

و هو مشكورا حاول يتصل بعيانين من اللى هما واخدين العيا مهنة و Professional لكن واحد اتسجن و التانى (عم شعبان) مش فاضى .. دخلنا 5 مرات قبل كده إحنا بناخد صدر دلوقت و الراجل عنده مرض صدر و مرض فى القلب و مرض فى الغدد الصماء و شغال على كله و طبعا ما بيتعالجش .. كل يوم بيكون فى راوند شكل ، فالنهارده الراجل مش فاضى وراه راوند Endocrine

المهم .. كان مضطر انه يجيب عيان بجد من اللى ما بيتاجروش ! لأن مثلا عم شعبان عارف انه بياخد 40 جنيه و بيتفحص و هو مبسوط أوى بكده و دا أكل عيشه (40 جنيه كل يوم * 22 يوم = 880 جنيه فى الشهر) اللى هو انا أصلا ما بشمش نصهم لما أتخرج !

الدكتور قالنا على واحد فى مستشفى الصدر .. و قالى روح "شيته" و فهمّه انه بكره فى "كونسولتو" دكاترة و دكتور كبير هيشوفه و يطمنا عليه ، أصل هو ابن ناس ، أوعى تديله فلوس و لا تفهموه انه راوند و طلبة و كده و بعد ما تخلصه هاتله شوية بسكوت و عصير و قوله دا فطارك و خلاص !

عيان .. أكبر من أبويا (68) سنة عنده ربو شعبى (Bronchial Asthma) فى داخل مستشفى الصدر (اللى هى مزبلة أصلا) فى الدور الرااااابع و بدون أسانسير و دا شكل السلالم

روحناله و كان مرحب بينا جدا و كان عايز يقوم يعملنا شاى و يضايفنا ، و نورتوا يا دكاترة و الكلام الحلو بتاع الناس الكبار دا .

أخدنا منه الشيت و فحصناه على خفيف كده و قولناله بكره بقى هتيجى العيادة الشاملة (سوق التلات) عشان فى دكاترة كبار هيشوفوك و فى كونسولتو و حاجات كده .

تحت أمركم تحت أمركم يا دكاترة و نورتوا و آنستوا

الصبح الساعة 8 .. النوبة جت لعم "سيد" و كرشة النفس بقت رهيبة و مش قادر يتنفس خالص و طبعا لا داعى للكلام عن مستوى التمريض و التنظيم "الرهيب" فى المستشفى

روحناله عشان نجيبه من الدور الرابع مستشفى الصدر للدور التالت فى العيادة الشاملة و هو فى حالته المتأزمة و أخد ماسك الأوكسيجين و حالته تحسنت قليلا .. و لكنه أملا فى انه يقابل كونسولتو دكاترة جه على نفسه و نزل معانا الـ 4 أدوار على السلالم المهترئة و مشى حتى العيادة الشاملة و طلعنا الدور التالت

فى يوم ميلادى

النهارده يوم ميلادى الـ 21

و كالعاده الحاج Facebook الله يمسيه بالخير هو اللى افتكر و فكر اللى حواليا :D

النهارده يمكن مش يوم مميز اللهم إلا الشتا (ساعة بتغرق البلد) مش عارف أمال لو كاترينا و العياذ بالله جه عندنا و لا حبة أمطار استوائية كان ايه اللى حصل ... دا 6.2 ريختر سنة 92 كان أكبر كارثة زلزالية لمصر فى العصر الحديث !

مش هجيب سيرة اليابان عشان البلد دى بتحرق دمى دايما بس بلاد زى تركيا مثلا اللى بتقع على حزام زلازل بيتقدر تقاوم الكوارث ازاى ؟؟

الله يمسيه بالخير أحمد الشقيرى جابلنا لقطات من هناك

بصوا مثلا الحلقة دى

و دى كمان

لو سمحت لو ما اتفرجتش عليهم حاول تشوفهم .. لو مشغول دلوقتى حملهم و ابقى شوفهم فى وقت فاضى عندك !

و على رأى الشقيرى : يعنى مسؤل هنا عنده مشكلة جاعد يفكر لها فى حلول و يسوى منها فلوس و نفس المسؤل هنا مسوياله صداع و مو عارف يحلها ... يبجى ليش المسؤل اللى هنا ما يروح للمسؤل اللى هنا و يجوله كيف سويت هذا و كيف عملت هذا ؟!؟!!!

ما علينا ... غير كده امبارح سمعت كلمة "بس أيام حسنى كانت أحلى ييجى مليون مرة" ... حاجة تقرف فعلا ، كله باصص تحت رجليه و بصراحة لو ما كناش رجالة و قدرنا ننتزع حريتنا على رأى مالكولم إكس يبقى هنشوف أيام ألعن من بتاع مبارك و ألعن من دلوقتى كمان !!

اليوم فعلا اللى حابب أتكلم عنه و اللى مش هنساه أبدا كان يوم فى ضيافة صديقى : عبد اللطيف الطحان و أسرته الكريمة

فكرة فى دماغه انه يعزمنا فى مكان جميل عندهم فى كوم حماده فى البحيرة ... مكان كل ما تمد بصرك تلاقى لون أخضر أو لو بصيت فوق يبقى أزرق ... بس

المسافة ما بين البيوت و بعضها شاسعة ... الأماكن دى مبدعة فعلا !

الواحد طول فترة تواجده هناك حاسس براحة غرييبة أكتر من لو كان فى بيته شوية ... إحساس كده اللى هو ما فيش حدود ... انطلق

و الهوا الحمد لله كان رائع (أحسن من هوا البحر على فكرة) بعد الانتهاء من جريمة حرق قش الرز :D

المهم كان فى صحبة رائعة من ناس كلهم و بصراحة مش (الأصدقاء المقربين) ليا و كان فى اتنين لأول مرة بتعامل معاهم بس أظن اليوم دا فرق جامد معانا كلنا

طبعا مش محتاج أتكلم على الكرم و الضيافة "الخزعبلية" على رأى محمد يسرى اللى لاقيناها هناك من أسرة عبد اللطيف كلها

و بالتأكيد طالما معاك أحمد الفقى اعرف انك لازم هتتأخر .. وبالفعل اتأخرنا نص ساعة فى التحرك و كانت ممكن انها تزيد لولا والدته - الله يكرمها و يصبرها على ما بلاها - صحته بالـجز...بالعافية

أحمد الفقى دا أصلا كائن خرافى هبقى أتكلم عليه بعدين لوحده

المهم انطلقنا فى صحبة أحمد رسلان و أحمد جلال و محمد يسرى و الـفقى

45 دقيقة وصلنا كوم حماده لنجد أسامه و على فى انتظارنا و من الواضح سيطرة الأحزاب الاسلامية فى كوم حماده زيها زى معظم مراكز المحافظات فى مصر

اتقابلنا بعبد اللطيف بعد حوالى ساعتين من الموعد المحدد بس بيس !

ربع ساعة أخرى و كنا وصلنا إلى "المكان السحرى"

التدوين و سنينه

بعد غياب - انا مش عارف ايه سببه - راجع أكتب النهارده عن المدونة دى

المكان اللى الواحد بيبع فيه كل حاجة .. لكن للأسف و لسبب أجهله برضه ما عدتش بكتب فيها ، فى الأول كنت واخدها زى كرسى فوتيه فى عيادة طبيب أمراض نفسية و عصبية و دى بجد كانت أحلى أيام لكن بعد فترة لما لاقيت بيجيلى زوار كتير قعدت أحضر فى كل موضوع أكتب عنه و أرميه فى الدرافتات لغاية ما وصل عدد الدرافتات عندى حوالى ضعف المنشور !!

و دا لييييه بقى ؟؟ لأن سعادتى كنت فاكر ان كده بحاول أحافظ على مستوى المحتوى اللى موجود فى المدونة ... لكن دا أكبر غلط ، من الآخر المدونة دى هى اللى باقيالى و الفترة الجاية معلش هصدعكم كتيييير بيها و كمان مواضيع تلقائية مش متحضرة و هحاول أنشر حاجات من اللى مغرقة الدرافتات دى !! و كمان هحاول أحكى عن حاجات حصلت فى فترة التوقف عن التدوين دى و ربنا يسهل

أيا كان عدد اللى بيقرا واحد مية ألف أو أنا لوحدى ... بداية تفكيرك ان اللى بتعمله دا مالوش أهمية أوى ، و إن انت مش مؤثر اعرف ان دا بداية فشل كل شئ بتعمله و هتعمله ، و على رأى ستيف جوبز ، ما تقدرش توصل النقط لقدام .. احنا لما بنطلع لقدام و نبص ورانا نقدر نوصل النقط و نعرف الطريق ماشى ازاى ... فكل يوم همشى فيه و اكتب فيه زى ما انا أحب و خلاص و فى النهاية

Stay Hungry .. Stay Foolish

الأفضل و الأسوأ فى رمضان

أولا كل سنة و حضراتكم طيبين (متأخرة أنا عارف) .. انا بقالى تقريبا شهرين و 20 يوم ماكتبتش حاجة جديدة !

بس خلال الفترة دى انا اكتسبت خبرات جديدة كتير و كنت بحاول أكتب فى المدونة بس كل ما أكتب حاجة بسيفها Draft و ما بعملش Publish لأى حاجة :(

ظناً منى ان الكلام اللى انا كاتبه دى عادى و ان ممكن يكون فى أحسن و كل الكلام الفكسان دا .. لغاية ما لاقيت الفيديو العبقرى دا :

و أخترت الدرافت دى أرجع بيها تانى للتدوين .. يارب تعجبكم :)

أفضل برنامج

خواطر 7

فعلا فعلا يمكن يكون دا أفضل برنامج شوفته على مدار التلات سنين اللى فاتوا ... أحمد الشقيري و كل فريق العمل بذلوا مجهود غير طبيعى فى الإعداد و التصوير و المونتاج عشان يطلعولنا الإبداااااااع دا

تصوير و إخراج و مونتاج و مؤثرات .. عمل إعلامى هادف متكامل اللى ما اتفرجش عليه خسر كتير

لمن لا يعرف فأحمد الشقيرى نوع من الدعاة اللى مؤمنين بإن كل مشكلة فى بلادنا ليها حل و علينا أن نبحث عن الحلول فكان شعار هذا الموسم : اطلبوا الحل و لو فى الصين

دى كانت أول حلقة وفيها تقديم للموسم كله

فى الموسم دا صوّر فى 9 بلدان حول العالم

تركيا - الصين - السويد - النرويج - فنلندا - الدانمارك - السعودية - مصر - الإمارات

استعرض فيهم حلول عبقرية و منها التجربة التركية بقيادة أردوغان
وعرفت دوَل العالم الأول دى هى دول عالم أول ازاى و ليه ؟! و عرفت ليه الشيخ محمد عبده بيقول "رأيت إسلاماً بلا مسلمين"  ..

إعداد البرنامج استغرق حوالى 10 شهور و فعلا اللى ما تابعوش فى رمضان لازم يتفرج عليه (واجب قومى ودينى كمان) و لو على الأقل كل يوم حلقة ، هو موجود على يوتيوب فى Play List عملتها بالترتيب كاملة هنا

أسوأ برنامج

و بلا منازع .. ذلك البرنامج السخييييييف الممل الطويييل بسبب الفواصل الإعلانية القاتلة على قناة الحياة

رامز قلب الأسد .. انا نفسى أفهم أقعد ساعة و شوية بتفرج على إعلانات و المادة بتاع البرنامج ما تكملش تلت ساعة و يا ريتها مادة عليها القيمة بالعكس دى سخيفة و تافهة (إلى أقصى الحدود) و مملة ... أنا نفسى أعرف هستفيد إيه فى آخر الحلقة أو حتى فى آخر البرنامج كله !!!!

أفضل إعلان

رمضان العام دا اتعمل فيه أكثر من إعلان رائع لكن هحاول أرتبهم من وجهة نظرى

3

عطشان يا صبايا مع إن أنا بلدى النيل - اتصالات

2

افرد جناحك - كوكاكولا

1

تستمر شركة موبينيل فى صناعة أروع الإعلانات على الشاشات المصرية (نفسى يعملوا لقاء مع فريق الدعاية فى الشركة دى)

الايدين - موبينيل

أسوأ إعلان

هو ذلك الإعلان التافه الذى يبدأ بتلك الكلمة "الحقيرة" ... أصحابك زى بوكسراتك


أصحابك زى بوكسراتك ؟؟؟


أصحابك زى بوكسراتك !!!


أصحابك زى بوكسراتك .... مين الــ (@$%^&*_(%&^) اللى جت فى باله ؟؟!!

آه .. و مش هحط الفيديو

بالمناسبة كان فى سلسلة - للأسف - إعلانات زبالة برضه لبتاع كده اسمه تروشيبس .. فكرنى باعلان بطاطس فوكس اللى كل ما يتحط على سيرفر السيرفر يقع :D

أفضل مسلسل

بالمناسبة فى رمضان ما بشوفش مسلسلات لكن السنة دى شفت مسلسل واحد و عجبنى جدا ككوميديا مش كمحتوى و هو :

الكبير أوى

أسوأ مسلسل

و حكمى دا بناء على "لقطات عديدة من الحلقات" لأنى بالتأكيد مش هحاول حتى أتفرج على حلقة مدتها ساعتين إلا 10 دقايق ...

ليه يعنى ؟؟!! و طبعا انا بتكلم على المسلسل الممطوط و اللى هيفضل ممطوط و هو

الدالى

ت ح ر ش

كتبها ضياء السواحلى و يمنى مرعى

20\6

لمن لا يعلم فالنهارده يوم التدوين ضد التحرش فى مصر

الكلمة فى حد ذاتها وقعها على الودن بيضايق ... و فى كمان ناس ممكن تقولك يا عم عيب تتكلم فى الموضوع دا و تفضح البلد و تشوه سمعتها قدام الأجانب

أولا انا ضد النظرية دى تماما ... لازم نفتح كل مشاكلنا و نقدمها لنفسنا أولا و نحاول نلاقيلها حلول و على فكرة الأجانب هما أكثر المتضررين بالمشكلة دى تحديدا

على فكرة ما كنتش ناوى أكتب حاجة عن الموضوع دا لأنى يمكن بعيد عنه شوية و مش ملم بكل أبعاده عشان كده استعنت بجهات خارجية فى الكتابة و ان شاء الله تعجبكم فكرة التدوين المشترك دى

لما قعدت أدعبس عن الموضوع دا شوية طلعلتى أرقام مخيفة جدا و من مين (CNN)

بيقولك 83 % من المصريات تعرضن للتحرش .... خد بالك تعرضن فعل ماضى و دى الحالات اللى اتعرفت

يعنى لو انت محاط حواليك بـ 5 هما مثلا زوجتك ، أختك ، خالتك ، بنتك ، أمك

يبقى سعادتك 4 منهم اتعرضوا للتحرش سواء لفظى أو جسدى ... و الله مش انا اللى بقول دى الـ CNN

متخيل ؟؟؟؟

و اسمع بقى اللى جاية دى

98% من الأجنبيات اللى زاروا مصر اتعرضوا لتحرش

و بيقولك حضارة 7000 سنة و شعب متدين ، يا أخى (.....)

يعنى نورت مصر و كرم الضيافة و بلد الألف مئذنة بقت بلد التحرش و بلد انسان الغابة اللى عمره ما شاف حريم قبل كده !

على فكرة سُمعتنا برة ان احنا بقينا (شعب) لا يحترم حقوق الانسان استنادا على التحرش يعنى لا تقولى حكومة و لا غيره ، دى بقى أخلاق شعب ، على فكرة انا ما بعفيش الحكومة من المسؤلية و لكن فى الموضوع دا بالذات ذنب الحكومة غير مباشر

كلامى اللى جاى دا بقى موجه للحيوانات

أيوة الحيوانات .... ماهو اللى بيجرى ورا شهوته دا بدون ما يستخدم الشئ اللى ربنا ميزة بيه عن الحيوانات يبقى زيهم

بالصور .... زيارة لمستشفى الباطنة الجامعى

أكتب لكم هذا الموضوع فى التوقيت الذى تسبب إهمال من مسؤلى الجامعة و بالتحديد مسؤلى المدينة الجامعية فى إصابة أكثر من 80 طالبا من زملائى سكان المدينة الجامعية طلاب كليات الحقوق و الهندسة و الطب بالتسمم الغذائى ... و لم نجد إجابة عند السيدة هالة فؤاد "رئيس الجامعة" و العضو السابق فى لجنة السياسات فى الحزب الوطنى المنحل سوى أن الطلاب اشتروا مواد غذائية من الخارج و لو كان التسمم من داخل المدينة الجامعة لتسمم الطلاب جميعا !! و خرجت علينا فى برنامج الحياة اليوم لتقول أن الطلاب يتناولون المنشطات !

شكلها لسه مش عارفه ان البلد فيها ثورة !

و إليكم بيان مشترك من اتحاد طلاب طب و حقوق طنطا

و عايز أعرض عليكم تفاصيل زيارة لمستشفى الباطنة بجامعة طنطا

بما انى طالب فى كلية الطب بيطلبوا مننا فى قسم الصحة العامة اننا ننزل أحد العنابر فى أحد المستشفيات الجامعية و نعمل تقرير عن حال العنبر من حيث النظافة و التحكم فى العدوى

توزيعى كان مستشفى الباطنة ، عنبر 11 ، الدور الخامس

ملحوظة : الزيارة تمت يوم 12\12\2010 و قررت عدم الكتابة عن الموضوع و انى أسعى بالصور اللى معايا أروح بيها لأى مسؤل

لكن بعد تصريحات رئيسة الجامعة و مواقفها المريبة المتكرره ... لأ من حق الناس تشوف هما بيعاملوا أهالينا ازاى

روحت العنبر و تعمدت عدم لبس البالطو الأبيض عشان الناس تعرف تتكلم معايا أول ما دخلت العنبر لقيت ناس موجودين فى زيارة فى غير معادها و جايبين أكل من بره و قاعدين على السرير (راجل و مراته و بنته) و فاتحين حلة مكرونة و ..

- اتفضل معانا يا بشمهندس

- لأ شكرا

- بص يا أستاذ أنا جاى هنا أسأل عن حال العنبر و أخبار النضافة فيه

- فى الأول الراجل خاف منى جدا لكن لما اتلم 5 أو 6 من العيانين اتشجعوا و حكولى بلاوى عن وجود صراصير فى العنبر و تأخير فى مواعيد اعطاء الدواء و مرضى بالسكر يتأخر عليهم مواعيد الطعام و زيارات فى غير مواعيدها و غيرها و إليكم ما صورته

الأرضية

يجب أن تكون نظيفة و جافة و الحوائط ليس بها شروخ

دى الحاجة الوحيدة اللى لقيتها الصراحة .... طبعا مع عدم وجود أكياس قمامة حمراء !

أسرّة المرضى

FACEBOOK

الضياء ... لقطة من تصويرى لغروب الشمس

فى البداية أنا حابب أكتب البوست دا عشان آخد رأيكم فى التعديلات الجديدة فى المدونة هنا .... و اللى مش واخد باله يقول رأيه و خلاص

و كان فى زى وعد بينى و بين نفسى ان لو المدونة جابت 4000 زائر هعملها صفحة على الفيس بوك

طب هتعمل ايه يعنى على الصفحة دى و ايه لزومها .... انت فاكر نفسك يعنى المجلس الأعلى للقوات المسلحة ؟؟؟

هو من الواضح انك ساعة ما بتيجى تشير مقال مكتوب على الفيس

لو افترضنا 10 هيشوفوا اللينك

كيف تغرد مع العصفور .. تـــويـــتـــر

فى الفترة الأخيرة أثناء الثورة و ما بعدها لعب تويتر دورا لا يقل أهمية عن الفيسبوك (مفجر الثورة) فى نشر الأخبار و التداول و المناقشات

و بعد استطلاع بسيط و بحث على الانترنت فى مقارنة أعداد المستخدمين العرب لموقعى فيسبوك و تويتر وجدت ان تويتر لا يزال بعيدا عن القاعدة الشعبية للعرب

و لاحظت أن الكثير من أصدقائى لا يستمتعون بهذا الموقع الرائع

ما هو تويتر ؟

عايزين نوصل للشارع

دلوقتى احنا مقبلين على مرحلة تاريخية فى مصر و عندنا ان شاء الله استفتاء على التعديلات الدستورية قريبا و انتخابات المجالس النيابية و رئاسة الجمهورية

المشكلة ان البلد بقالها أكتر من 40 سنة فى حالة "ضلمة سياسية"

النظام السابق هو اللى كان بيعمل كده و أصبح خلالها نائب مجلس الشعب الكويس هو اللى بيجيب قرارات علاج على نفقة الدولة أو وظايف فى شركة البترول أو اللى يعرف ينقل موظف حكومى من حلايب لمصلحة لجمب بيته

و أنا هنا مش فى مجال انى أتكلم على التعديلات الدستورية و رأيى فيها و لا ايه هو دور نائب مجلس الشعب المحترم ، لأن دا مش دورى و فى ناس كتـيــــــــــــر بتقوم بالدور دا أحسن منى بمراحل و كل مقالات الناس دى و حلقاتهم التليفزيونية متوفرة للجميع

رسائل قصيرة

فى الأول تويتر اتحجب ،

و بعدين شوية مواقع اخبارية

و بعدين فسيبوك

و بعدين خدمة الـ SMS

و بعدين النت كله

و بعدين الاتصالات كلها

و أخيـــــــــــــــــــــــــــــرا النت رجع و مع رجوع النت قولت ألحق "قبل ما يقطعوه تانى" اكتب شوية رسايل ما عرفتش أبعتها من موبايلى

جوليا بطرس ... Download The New Album

من هى جوليا بطرس ؟؟

تلك الصورة تعتبر خير اجابة على هذا السؤال ... فجوليا مثال للفنان الواعى المتألق ، الذى يعرف أن هناك ما هو أكبر من الفن و أن الفن هو وسيلة لا غاية

و إنما توجد فى الحياة غايات أعظم و أسمى

ربما لا تحظى بشهرة واسعة فى الأوساط الشعبية و لكن الأمور لا تقاس بالشهرة ..

هى مغنية لبنانية ولدت عام 1968 ... غنت العديد من الأغانى الوطنية اللبنانية للمقاومة و التحرير (و لها رونقها الخاص أيضا فى الأغانى الرومانسية)

ربما تكون أشهر أغنية وطنية لها هى "أحبائى" التى غنتها بعد حرب لبنان 2006 و هى فى واقع الأمر صيغة معدلة من خطاب حسن نصر الله بعد الحرب

مالا يعرفه الكثير هو أنا أحبائى لم تكن مجرد أغنية أو فيديو كليب ، بل كان مشروع ضخم قامت به جوليا

الأبراج !!!؟؟؟

من صغرى أيام ما كنا بنجيب أهرام الجمعة (زماااان يعنى) كنت متعود افتح الجرنان و أقلب فى الصور و الحتة بتاع "صدق أو لا تصدق" اللى مكتوبة دايما بخط الايد دى و جمبها "حظك اليوم" و كنت مش فاهم اسامى الحيوانات اللى بقراها دى علاقتها ايه بالكلام اللى مكتوب جمبها !!!

سألت والدى عن الموضوع دا و بدأ يفهمنى و قالى ان دا طبعا كله كذب و المفروض ما نؤمنش بالكلام دا

و بمبدأ الفضول و ان الممنوع مرغوب كنت بقراها بس ما بصدقهاش و لا بقتنع بيها ... تدريجيا ما عدتش بقراها تانى

ـــــــــــــــــــــــــــــــــــ

من فترة كده لقيت اعلانات

اتصل و اعرف : حظك اليوم و برجك العادى و برجك الصينى و برجك العربى و برجك الرقمى و حجرك الكريم و رقمك المفضل

تكاثروا بقى