فى السنين الأخيرة شوفت دعوات و مطالبات كتييير بتغيير شعارنا سواء العلم أو النسر و امتدت المطالبات دى من المدونات للفيس و مجموعات و صفحات بل استحوذت الأفكار دى على بعض الرسامين و الكتاب و المفكرين
إنما اللى كان أقوى حاجة فعلا هو استضافة منى الشاذلى لمجموعة من المطالبين دول و معاهم رسام حاول يعمل كذا تصميم لعلم جديد لمصر
و من خلال الحلقة قدروا يلخصوا ليه الناس بتطالب بكده
هما قالوا أولا ان العلم دا غير معبر عننا و النسر دا حاجة احنا مش مشهورين بيها مش زى الأهرامات و أبو الهول أو النيل مثلا
"يعنى مثلا لو انت فى اى مطار فى العالم و ظابط الجوازات شاف جواز سفرك و لقى عليه النسر أكيد مش هيعرف انت منين انما لو جواز السفر عليه الأهرامات أكيد هيعرف انك مصرى و يديك احترامك كمصرى"
و أظهرلنا بعض التصميمات اللى هو منفذها كان منها واحد عبارة عن خط أزرق (النيل) قاسم العلم بالعرض و فوقه الاهرامات و تحته مفتاح الحياة .... و تصميمات تانية أخرى
و منهم اللى اتكلم فى العصرية و ان لازم يبقى الشعار عصرى يعبر عن مصر منذ 7000 سنة و حتى الآن و انه لابد من تجديده كل فترة عشان يتلاءم مع المستجدات اللى فى مصر
و منهم اللى قال ان فى دول غيرنا كتير مشتركة معانا فى ألوان الأحمر و الأبيض و الأسود و احنا لازم نبقى متميزين
على طول جه فى دماغى منظر العيال السيس اللى و هو بيشترى لبس لازم يطمن ان مافيش حد غيره لابس نفس لبسه أو اللى بيغير طريقة لبسه على حسب الموضة و يزعل أوى لو شاف واحد لابس نفس التى شيرت اللى لابسه مثلا
و هو معلش يعنى ... من امتى كان الشعار هو العائق عن معرفة صاحبة أو اللى تحت لواءه أو اعطاؤه الإحترام ؟
و بعدين كده أحسن ... لما ظابط الجوازات ما يعرفش انت منين أحسن ما يعرف انك مصرى ... حاليا
بالعكس الشعار هو اللى بياخد أهميته و احترامه و شهرته من أهمية و احترام و شهرة صاحبه
يعنى مثلا العلم الأمريكى مشهور و محترم عشان هو أحمر و أبيض و أزرق و لا عشان النجوم مثلا ؟
أو العلم الفرنسى ... أهو دا مثال جامد أوى لأن معاه برضه 5 أو 6 دول مشتركين فى ألونه الأحمر و الأبيض و الأزرق
الباسبور الامريكى الأزرق أو الألمانى الأحمر .... هما مثلا اللى بيدوا الاحترام لحامله ... و لا البلد نفسها ادت احترام لمواطنيها و بالتالى لجوازات سفرهم ؟؟
طب خد مثال
لو أمريكا بكره الصبح غيرت علمها للشكل الأهبل اللى انا راسمه دا
 |
| علم امريكا القادم |
مش هيبقى مشهور ؟؟؟
مش هياخد احترامه ؟؟؟
هل اللى ماشى يحمل الجنسية الأمريكية مش هتفتحله كل الأبواب بمجرد رفع هذا العلم ؟؟؟
مش أى مبنى فى العالم رافع العلم الأهطل دا هيبقى متروس أمن و حراسات و له أهمية عالمية كبيرة ؟؟
و احتمال كبير تلاقى الكل طالع يفتى و يحاول يفسر الرمزيات "العميقة" وراء الألوان دى و تناسقها "المدهش" ... أو أى كفتة بقى
