الاثنين، 14 نوفمبر، 2011

فى يوم ميلادى


النهارده يوم ميلادى الـ 21
و كالعاده الحاج Facebook الله يمسيه بالخير هو اللى افتكر و فكر اللى حواليا :D

النهارده يمكن مش يوم مميز اللهم إلا الشتا (ساعة بتغرق البلد) مش عارف أمال لو كاترينا و العياذ بالله جه عندنا و لا حبة أمطار استوائية كان ايه اللى حصل ... دا 6.2 ريختر سنة 92 كان أكبر كارثة زلزالية لمصر فى العصر الحديث !
مش هجيب سيرة اليابان عشان البلد دى بتحرق دمى دايما بس بلاد زى تركيا مثلا اللى بتقع على حزام زلازل بيتقدر تقاوم الكوارث ازاى ؟؟
الله يمسيه بالخير أحمد الشقيرى جابلنا لقطات من هناك

بصوا مثلا الحلقة دى


و دى كمان


لو سمحت لو ما اتفرجتش عليهم حاول تشوفهم .. لو مشغول دلوقتى حملهم و ابقى شوفهم فى وقت فاضى عندك !

و على رأى الشقيرى : يعنى مسؤل هنا عنده مشكلة جاعد يفكر لها فى حلول و يسوى منها فلوس و نفس المسؤل هنا مسوياله صداع و مو عارف يحلها ... يبجى ليش المسؤل اللى هنا ما يروح للمسؤل اللى هنا و يجوله كيف سويت هذا و كيف عملت هذا ؟!؟!!!

ما علينا ... غير كده امبارح سمعت كلمة "بس أيام حسنى كانت أحلى ييجى مليون مرة" ... حاجة تقرف فعلا ، كله باصص تحت رجليه و بصراحة لو ما كناش رجالة و قدرنا ننتزع حريتنا على رأى مالكولم إكس يبقى هنشوف أيام ألعن من بتاع مبارك و ألعن من دلوقتى كمان !!

اليوم فعلا اللى حابب أتكلم عنه و اللى مش هنساه أبدا كان يوم فى ضيافة صديقى : عبد اللطيف الطحان و أسرته الكريمة



فكرة فى دماغه انه يعزمنا فى مكان جميل عندهم فى كوم حماده فى البحيرة ... مكان كل ما تمد بصرك تلاقى لون أخضر أو لو بصيت فوق يبقى أزرق ... بس

المسافة ما بين البيوت و بعضها شاسعة ... الأماكن دى مبدعة فعلا !
الواحد طول فترة تواجده هناك حاسس براحة غرييبة أكتر من لو كان فى بيته شوية ... إحساس كده اللى هو ما فيش حدود ... انطلق
و الهوا الحمد لله كان رائع (أحسن من هوا البحر على فكرة) بعد الانتهاء من جريمة حرق قش الرز :D



المهم كان فى صحبة رائعة من ناس كلهم و بصراحة مش (الأصدقاء المقربين) ليا و كان فى اتنين لأول مرة بتعامل معاهم بس أظن اليوم دا فرق جامد معانا كلنا



طبعا مش محتاج أتكلم على الكرم و الضيافة "الخزعبلية" على رأى محمد يسرى اللى لاقيناها هناك من أسرة عبد اللطيف كلها

و بالتأكيد طالما معاك أحمد الفقى اعرف انك لازم هتتأخر .. وبالفعل اتأخرنا نص ساعة فى التحرك و كانت ممكن انها تزيد لولا والدته - الله يكرمها و يصبرها على ما بلاها - صحته بالـجز...بالعافية

أحمد الفقى دا أصلا كائن خرافى هبقى أتكلم عليه بعدين لوحده

المهم انطلقنا فى صحبة أحمد رسلان و أحمد جلال و محمد يسرى و الـفقى
45 دقيقة وصلنا كوم حماده لنجد أسامه و على فى انتظارنا و من الواضح سيطرة الأحزاب الاسلامية فى كوم حماده زيها زى معظم مراكز المحافظات فى مصر
اتقابلنا بعبد اللطيف بعد حوالى ساعتين من الموعد المحدد بس بيس !
ربع ساعة أخرى و كنا وصلنا إلى "المكان السحرى"




من لعب بينج بونج إلى تمشية فى الأراضى و تصوييييييير كتير و عبور الترع من على جسور صغيرة و نصف جذع نخله !! إلى ركوب خيل و أكل فلاحى أصلى !




الدنيا ليلت و بدأنا نتكلم فى ظل إصرارنا على عدم استخدام لمبة .. و اقترح أحمد رسلان اننا نلعب لعبة الصراحة فى وجود زجاجة بلاستيك !



و لكن حركتنا كانت بطيئة جدا بفعل الأكل اللى أصر عبد اللطيف انه "يزعطنا" .. حصيرة تحت القمر اللى كان مكتمل بس حواليه هالة ضوئية غريبة كاملة الاستدارة و افتكر الكل حوار "الكويكب" اللى جاى يلقى بظلاله على الليلة المميزة دى

و على الحصيرة .. و لأول مرة كنت بلعب لعبة الصراحة "مهمة كل فترة تلعبها مع أصحابك على فكرة"

و لن أنسى الحاج "خالد" خال عبد اللطيف اللى أضاف الكثير من المرح لليوم بلكنته البحراوى المميزة و شخصيته الخيالية

ملحوظة أخيرة :

الصورة دى لو لاقيتها فى أى حته إحنا اللى مصورينها ... عشان الكريديت يروح لأصحابة بس :P




عبد اللطيف اللى كتبها بالسكينة على التفاحة .. و انا صاحب اللى صورتها و كتبت الكومنت دا عليها


سبحان الله ... تفاحة تكتب No SCAF
إعجاز علمى جديد و مبهر و خزعبلى ، فتحنا التفاحة فوجدناها مكتوب عليها No SCAF 
انشرها بقدر بقدر كرهك للمجلس العسكرى و إذا لم تنشرها فاعلم أن ذنوبك هى التى منعتك ، و سبحان الله و الحمد لله

و طبعا انا هنا بتريق على مليون حاجة من اللى بنشوفها ع الفيس و يقولك فى الآخر أستحلفك بالله أن تنشرها و واحد اتحرق النهارده عشان ما نشرهاش و اللى نشرها اتجوز أربعة فى نفس اليوم و الكلام الغبى دا ! و الحمد لله الصورة عملت صدى بس أحلى كومنت من :

Morad Edwar وعلى الفور ارسلنا التفاحة الى معمل بيتنزبرج فى المانيا وقال الدكتور جودن براخ ان التفاحة طبيعية وليست بفعل فاعل وعلى الفور اسلم الدكترو قصدى بقى مسيحى يوووووه قصدى بقى ضد المجلس العسكرى

واضح ان كان معانا هناك و انا مش واخد بالى :D

و فى صفحات كبيرة نشرتها

الصورة الأصلية
أول صفحة
تانى صفحة
تالت صفحة


و الله الواحد لو يعرف انها هتعمل الصدى دا كله كان عمل زى المصورين الهواه و كتب اسمه بعرض الصورة :D


و العداد مستمر :D و اللى عايز يستخدمها يدوووس

و كل سنة و انتم طيبيييييييييين

Photos By : Ahmed El-Feky