الأربعاء، 4 مايو، 2011

بالصور .... زيارة لمستشفى الباطنة الجامعى




أكتب لكم هذا الموضوع فى التوقيت الذى تسبب إهمال من مسؤلى الجامعة و بالتحديد مسؤلى المدينة الجامعية فى إصابة أكثر من 80 طالبا من زملائى سكان المدينة الجامعية طلاب كليات الحقوق و الهندسة و الطب بالتسمم الغذائى ... و لم نجد إجابة عند السيدة هالة فؤاد "رئيس الجامعة" و العضو السابق فى لجنة السياسات فى الحزب الوطنى المنحل سوى أن الطلاب اشتروا مواد غذائية من الخارج و لو كان التسمم من داخل المدينة الجامعة لتسمم الطلاب جميعا !! و خرجت علينا فى برنامج الحياة اليوم لتقول أن الطلاب يتناولون المنشطات !

شكلها لسه مش عارفه ان البلد فيها ثورة !


و عايز أعرض عليكم تفاصيل زيارة لمستشفى الباطنة بجامعة طنطا

بما انى طالب فى كلية الطب بيطلبوا مننا فى قسم الصحة العامة اننا ننزل أحد العنابر فى أحد المستشفيات الجامعية و نعمل تقرير عن حال العنبر من حيث النظافة و التحكم فى العدوى

توزيعى كان مستشفى الباطنة ، عنبر 11 ، الدور الخامس

ملحوظة : الزيارة تمت يوم 12\12\2010 و قررت عدم الكتابة عن الموضوع و انى أسعى بالصور اللى معايا أروح بيها لأى مسؤل
لكن بعد تصريحات رئيسة الجامعة و مواقفها المريبة المتكرره ... لأ من حق الناس تشوف هما بيعاملوا أهالينا ازاى

روحت العنبر و تعمدت عدم لبس البالطو الأبيض عشان الناس تعرف تتكلم معايا أول ما دخلت العنبر لقيت ناس موجودين فى زيارة فى غير معادها و جايبين أكل من بره و قاعدين على السرير (راجل و مراته و بنته) و فاتحين حلة مكرونة و ..

- اتفضل معانا يا بشمهندس
- لأ شكرا
- بص يا أستاذ أنا جاى هنا أسأل عن حال العنبر و أخبار النضافة فيه
- فى الأول الراجل خاف منى جدا لكن لما اتلم 5 أو 6 من العيانين اتشجعوا و حكولى بلاوى عن وجود صراصير فى العنبر و تأخير فى مواعيد اعطاء الدواء و مرضى بالسكر يتأخر عليهم مواعيد الطعام و زيارات فى غير مواعيدها و غيرها و إليكم ما صورته

الأرضية

يجب أن تكون نظيفة و جافة و الحوائط ليس بها شروخ






دى الحاجة الوحيدة اللى لقيتها الصراحة .... طبعا مع عدم وجود أكياس قمامة حمراء !


أسرّة المرضى


يجب أن تكون نظيفة و مرتبة و بين كل سريرين أكثر من متر
مراتب المرضى يجب أن تكون من الاسفنج المغطى تماما بالجلد



و هنا نلاحظ بقعة "دم" على الملائة 




و تحت رأس المريض المرتبة مكشوفة على الاسفنج ! 



كراسى للزوار (خدمة خمس نجوم) 


الحمامات

يجب أن يكون لكل عنبر حمام مستقل للمرضى و حمام آخر للموظفين
يجب أن تكون أرضية الحمام نظيفة و جافة

ملاحظة : الصور القادمة قاسية ... برجاء عدم مشاهدتها إذا كنت من الأشخاص الذين يصابون بالغثيان






آسف لهذه الصور ... لكنها تلك الحقيقة التى لا تعرف عن الصدمة بديلا :(

برجاء ملاحظة أن هذا عنبر لأمراض الباطنية أى أن معظم الحالات كانت حالات كبدية

تخيلوا حال الحمام هذا و دوره فى نقل كل أنواع العدوى بين المرضى و بعضهم و بين المرضى و العاملين فى المستشفى

و عند سؤالى لبعض العاملات

- ليه سايبين الحمام كده ؟
- إحنا بتوع التغذية مالناش دعوة
- أمال مين اللى ماسك نضافة الحمامات ؟
- دى شركة بتبعت ناس بتوعها كل 12 ساعة
- اييييييييييه ؟؟؟ كل 12 سااااعة .... يعنى دا هيفضل 9 أو 10 ساعات كمان !!!!

الشبابيك

يجب أن تكون نظيفة من الداخل و الخارج و عليها سلك لمنع دخول الحشرات

و دى صورة من خلال الزجاج توضح مدى نظافته !



و دى بقايا السلك اللى كان موجود و صدى و تآكل 




أطعمه و مشروبات فى كومودينو من الخشب و كان بيحوى حشرات ! 



و أحب أختم بصورة صورتها فى مكتب التمريض فى العيادة الخارجية فى قسم الرمد !



فى النهايه .. أنا مش بشوه جامعتى و لا بسعى للتشهير بيها

بس المرضى اللى فى العنبر حملونى أمانه ان اللى انا صورته دا يوصل للمسؤلين و للناس

طبعا أنا فشلت فى توصيله للمسؤلين

أتمنى أكون أديت الأمانة دى !