الأربعاء، 2 فبراير 2011

رسائل قصيرة







فى الأول تويتر اتحجب ،

و بعدين شوية مواقع اخبارية

و بعدين فسيبوك

و بعدين خدمة الـ SMS

و بعدين النت كله

و بعدين الاتصالات كلها

و أخيـــــــــــــــــــــــــــــرا النت رجع و مع رجوع النت قولت ألحق "قبل ما يقطعوه تانى" اكتب شوية رسايل ما عرفتش أبعتها من موبايلى
  • كل الناس حذروا من قوى المعارضة انها تدخل و تسرق ثورة الناس ، و لكن الحقيقة ان مبارك نفسه هو اللى بيحاول يسرق ثورة الناس !
  • الحكومة جاية دلوقتى "بسلامتها" تدعو للحوار ، حوار ايه يا أجلاف و انتم أى حاجة ما تعجبكوش بتموتوها و تحجبوها و اسألوا النت و قناة الجزيرة
  • كل اللى أشفق على مبارك بعد خطابه دا أقوله انت عامل زى اللى صعب عليه ان أبو جهل يُقتل
  • شكرا مبارك : انت الوحيد اللى قدرت توحد كل المصريين بكل طوائفهم و فئاتهم ... على كراهيتك
  • النظام اللى يقتل شعبه و يحجب عنهم المعلومات نظام هش ضعيف جبان قذر يجب محاكمته
  • من يسحب قوات الشرطة من الشارع لا يستحق إلا الإعدام
  • قطعتوا الاتصالات الناس زادت فى المظاهرات ، لازم تتحاكموا بتهمة الغباء السياسى
  • كل اللى انخدعوا بخطاب "الطاغية" : هتشوفوا أوسخ أيام فى ال 8 شهور الجايين لو كملهم هتبقى أيام كلها قمع للحريات على النت و الاتصالات و مراقبة و سيظهر الوجه القبيح لقانون الطوارئ اللى الطاغية لم يتحدث عنه فى خطابه و البداية اهى فى التحرير حالا
  • كل "الجبانات" اللى خايفين من رحيله : خايفين ليه ؟ دلوقتى فى حكومة و فى نايب رئيس و فى دستور و لن يعجزنا الحفاظ على الأمن يومين كمان
  • دم الناس و دموع الأمهات و قلقهم على ولادهم لا يمكن السماح فيه ، بعد ان كانت المطالب هى - فقط - الرحيل لابد و أن تصل إلى المحاكمة لكل رموز النظام الفاسد و الفاسدون
  • الفترة القادمة هيحاول النظام بكل جهده شق صف الناس المتظاهرين بعد ما قدر بغباؤه المتناهى انه يوحدهم على كراهيته
  • الغباء السياسى : كلمة تعبر تماما عن النظام فاقد الشرعية اللى "نظريا" لسه بيحكم لغاية حالا لأنه كان يقدر يكسب حب الناس
  • لا يوجد ضمان واحد ملموس يجعلنى أصدق الكاذب اللى طلع خطب امبارح
  • هو حس ان نهايته قربت فطلع يكسب وقت على ما يشق الصف زيادة

فى النهاية فى حاجة مهمة عايز أتكلم فيها ، شركات "فودافون ، موبينيل ، اتصالات" و تى اى داتا و لينك و كل مقدمى خدمة الانترنت مش هينفع نسيبهم كده ، انا عن نفسى اتصلت بفودافون و طلبت منهم تعويض الناس تعويض مناسب و فى خدمة العملا الراجل كان متفهم تماما و وعدنى برفع طلبى دا لمجلس الادارة

 لكن بعد حوار طويل طلب منى أحددله ايه التعويض اللى ممكن يكون مناسب ؟؟ أرجو منكم انتم الاجابة على السؤال دا من خلال الكومنتات

و أرجو منكم الاتصال بمراكز خدمة العملاء للشركات السابق ذكرها و ابلاغهم اننا عاوزين تعويض مناسب




هناك 4 تعليقات:

  1. خللي مطالبك بخصوص الانترنت ضمان رسمي بحرية كاملة للإنترنت وضمان عدم قطعها في أي وقت من الأوقات دون أي ضغوط سواء من النظام أو غيره

    ردحذف
  2. el mafrod tesameha THE DARKENESS
    mafesh resalat tahde2a w7efaz 3ala elbalad

    ردحذف
  3. المظاهرات بدأت من يوم 25 يناير لغاية حالا سلمية سلمية سلمية و كنا بنمنع أى حد من التخريب احنا نفسنا و احنا نفسنا بنتظاهر الصبح و بنضف الشوارع و ننظم المرور و بالليل بنقف نحنى نفسنا و نحمى الناس ، لو هبعت رسالة هبعتها للكلاب اللى اعطوا الأوامر للبلطجية و دفعولهم فلوس عشان يحاربوا الشرفاء و المثقفين الموجودين فى التحرير ... شوف مين اللى بيرمى مولوتوف على المتحف المصرى !

    ردحذف
  4. كل اللى انخدعوا بخطاب "الطاغية" : هتشوفوا أوسخ أيام فى ال 8 شهور الجايين لو كملهم هتبقى أيام كلها قمع للحريات على النت و الاتصالات و مراقبة و سيظهر الوجه القبيح لقانون الطوارئ اللى الطاغية لم يتحدث عنه فى خطابه و البيداية اهى فى التحرير حالا


    بقول الجزء ده لناس كتير انهاردة
    ومبلاقيش منهم أي رد .. غير حرام عليك

    يا خوفي الكلام ده يبقي صح
    تبقي ضاعت الثورة .. وضاعت البلد .. وضاع مستقبلنا وحلمنا
    وفضلت سذاجة الشعب المصري .. ومبارك

    ردحذف