Pages

الجمعة، 29 أكتوبر 2010

تميزك ليس فى شعارك

فى السنين الأخيرة شوفت دعوات و مطالبات كتييير بتغيير شعارنا سواء العلم أو النسر و امتدت المطالبات دى من المدونات للفيس و مجموعات و صفحات بل استحوذت الأفكار دى على بعض الرسامين و الكتاب و المفكرين

إنما اللى كان أقوى حاجة فعلا هو استضافة منى الشاذلى لمجموعة من المطالبين دول و معاهم رسام حاول يعمل كذا تصميم لعلم جديد لمصر

و من خلال الحلقة قدروا يلخصوا ليه الناس بتطالب بكده

هما قالوا أولا ان العلم دا غير معبر عننا و النسر دا حاجة احنا مش مشهورين بيها مش زى الأهرامات و أبو الهول أو النيل مثلا

"يعنى مثلا لو انت فى اى مطار فى العالم و ظابط الجوازات شاف جواز سفرك و لقى عليه النسر أكيد مش هيعرف انت منين انما لو جواز السفر عليه الأهرامات أكيد هيعرف انك مصرى و يديك احترامك كمصرى"
 و أظهرلنا بعض التصميمات اللى هو منفذها كان منها واحد عبارة عن خط أزرق (النيل) قاسم العلم بالعرض و فوقه الاهرامات و تحته مفتاح الحياة .... و تصميمات تانية أخرى

و منهم اللى اتكلم فى العصرية و ان لازم يبقى الشعار عصرى يعبر عن مصر منذ 7000 سنة و حتى الآن و انه لابد من تجديده كل فترة عشان يتلاءم مع المستجدات اللى فى مصر

و منهم اللى قال ان فى دول غيرنا كتير مشتركة معانا فى ألوان الأحمر و الأبيض و الأسود و احنا لازم نبقى متميزين

على طول جه فى دماغى منظر العيال السيس اللى و هو بيشترى لبس لازم يطمن ان مافيش حد غيره لابس نفس لبسه أو اللى بيغير طريقة لبسه على حسب الموضة و يزعل أوى لو شاف واحد لابس نفس التى شيرت اللى لابسه مثلا

و هو معلش يعنى ... من امتى كان الشعار هو العائق عن معرفة صاحبة أو اللى تحت لواءه أو اعطاؤه الإحترام ؟

و بعدين كده أحسن ... لما ظابط الجوازات ما يعرفش انت منين أحسن ما يعرف انك مصرى ... حاليا


بالعكس الشعار هو اللى بياخد أهميته و احترامه و شهرته من أهمية و احترام و شهرة صاحبه

يعنى مثلا العلم الأمريكى مشهور و محترم عشان هو أحمر و أبيض و أزرق و لا عشان النجوم مثلا ؟
أو العلم الفرنسى ... أهو دا مثال جامد أوى لأن معاه برضه 5 أو 6 دول مشتركين فى ألونه الأحمر و الأبيض و الأزرق

الباسبور الامريكى الأزرق أو الألمانى الأحمر .... هما مثلا اللى بيدوا الاحترام لحامله ... و لا البلد نفسها ادت احترام لمواطنيها و بالتالى لجوازات سفرهم ؟؟

طب خد مثال

لو أمريكا بكره الصبح غيرت علمها للشكل الأهبل اللى انا راسمه دا

علم امريكا القادم

مش هيبقى مشهور ؟؟؟

مش هياخد احترامه ؟؟؟

هل اللى ماشى يحمل الجنسية الأمريكية مش هتفتحله كل الأبواب بمجرد رفع هذا العلم ؟؟؟

 مش  أى مبنى فى العالم رافع العلم الأهطل دا هيبقى متروس أمن و حراسات و له أهمية عالمية كبيرة ؟؟

و احتمال كبير تلاقى الكل طالع يفتى و يحاول يفسر الرمزيات "العميقة" وراء الألوان دى و تناسقها "المدهش" ... أو أى كفتة بقى 


طب ليه ؟؟؟

لأن البلاد دى حاليا هى اللى بتقود البشرية و أسمهت اسهامات مذهلة فى تطور العلوم و الفنون هيفضل التاريخ فاكرها و قول كل اللى انت عايز تقوله بالرغم من كل مساوئهم سواء الداخلية أو الخارجية

و الكلام دا تم بعمل شعبى و حكومى جاااااد طوال ال 200 سنة اللى فاتوا ... مش عارف خلال الوقت دا كنا بنشرب "كابتشينو" مثلا

و كمان الامهات اليومين دول اللى بتيجى تسمى ابنها أو بنتها تقولك أنا عايزة اسم جديد ما اتسماش قبل كده ... اسم يرن ... اسم غريب ... طب ليه يا ماما ؟؟؟ فاكرة مثلا كده هيبقى شخص متميز


الخلاصة 

تميزك ليس فى اسمك و لا فى مظهرك و لا فى شكلك و لا فى شعارك

تميزك فى عملك و أخلاقك و مدى عطائك و إسهامك فى المحيط اللى انت عايش فيه


كن أمريكا يُحترم شعارك
كن ألمانيا يُحترم جواز سفرك
كن مصدر للعلوم و الفنون و التكنولوجيا أو حتى كرة القدم  يُحترم مواطنيك
كن دولة منتجة يكن لك مكانتك و يُرفع شعارك فوق الأعناق


!!! حتى لو كان عبارة عن كتكوت مبلول



مع العلم ان النسر اللى فى علمنا هو النسر الذهبى أو نسر صلاح الدين و هو نوع نادر جدا من النسور مش موجود فى أى مكان فى العالم غير فى منطقة قلعة صلاح الدين


علم مصر الحالى

هناك تعليقان (2):

  1. يمكنك التأكد من صحة المعلومات بخصوص النسر الموجود فى علم مصر فى

    http://bit.ly/cjbIjq

    أو

    http://bit.ly/chxPp8

    او

    http://bit.ly/d8fn7B

    ردحذف
  2. موضوعك جميل وطريقة كتابتك بسيطه وشدتنى أكمل الموضوع للآخر

    بس احنا فعلا مشهورين بالنسر على جواز سفرنا
    يمكن هوا محتاج يصغر شويه بقى زى بقية الجوازات اللى شوفتها للدول التانيه
    بس النسر والعلم بالذات ليهم عندى معزه روحيه تانيه
    بغض النظر عن اللى بيحصل فى بلدنا

    أفنان

    ردحذف